Prinsegallerie

CV d'n Import kiek teruk op un geweldig 1 x 11 jubileumjaor. In de aanloap nao ut fees versjene d'r allerlei teasers met bekende figuranten. Op 4 november 2023 hubbe veer ut seizoen aafgetrap en mèt gans Ulestjraote en umstjreke os 1 x 11 jubileum gevierd. Ut woar unne geweldige aovend bie Leo, mèt optreijens van Frans Theunisz, RonnyRon, Oet ut Niks en Ivo van der Bijl. De 3 manne presenteerde de sjlager Nao Veure, dei woort ingezonde nao ut LVK. Helaas bleve veer steke in de kwart finale, althans, doa hawwe veer os mer aan vas.

Met prinses Margriet I  veurop trokken veer door de sjtraote van Ulesjtraote en Meersje, stonge de manne weer op ut Top 111 podium en maakte veer un speciaal aaflevering van  First Dates  die viral ging op YouTube. 

Ut thema dit joar woar Egypte. In Meersje hubbe ze ut altied euver de Romeine, meh veer hubbe van wherre zegge dat op d'n huppel neve de Kerrik al veul jerder unne pyramide stong...

Oetgesjlaope van de aafgelaope rustige jaore barjste de lede van d'n Import weer van de ideeën en energie. Captain Leon I is in de Notebalk bie Leo door de twjé Knöppele ingezonge en ut Love Boat thema woort bedach. In november prizzenteerde CV d'n Import de nuuije carnavalsjlager van ut dörp. Met 'De Powerpolonaise', unne sjwanne videoclip, un deepte-interview van MeerVandaag en un live hoeskamerconcert bie Prins Jack I en Prinses Resi woort ut tempo flink opgeveurt.  

De optochte in Ulestraote en Meersje woorte gelaope en d'r woort weer flink gedans door de dames en fors mét de zekdeuk gewapperd op 'Kom iech mer aon' van John Tana. De promo van de jerste aaflevering van de Love Boat 2.11 koam moandigmurrige al geliek online.

De wage kreeg neve de oetsjuufbare lif weer un nuuij elemint. Noa joare hoddele mét flesjkes howwe veer dit joar unne echte tap achterop, mét ozze eige Roel es barkieper.

De carnaval woort aafgesjlote met een spetterend optreije op ut podium van de Top 111 en later nog traditioneel bie Leo in de Notebalk ...

Noa jaore heen en weer renne en rondspringe durfde CV d'n Import ut in 2020 aan. Prins Ali Bart I woort geïnstalleerd en ut thema van 1001(1) nachte woort gekoze. In unne speciale keersjboodsjap leet heer zich veur de jerste kjer zeen. Heer koos neet wachte dat ut carnaval waor. De wage woort met un flink verankerde loapbrök oetgebreid; de kins Bart namelijk mét al ziene energie noe einmoal neet opsjlete in un klein bekske . D'n optoch in Ulestraote zow door ut schlechte weir verplaats weure noa de dinsdig, dus in Meersje woort op moandig aafgetrap. Mét vleegende tapijte en insjeurende pakke ginge veer vol gooie mood in de optoch veurop, neet weitende wat later dei middig ging gebeure. Unne daag mét unne verschrikkelijke zwarte rand.

In 2021 druimde CV d'n Import evekes weg in un live personferentie met premier Rutte meh mos helaas nog veur unne lange tied in de corona sjloap-stjand blieve stoon. Prins Ali Bart I is inmiddels de langstzittende prins van CV d'n Import. Ut is dat vur allemaol weite wie dat kaom, anders zowste bienao dinke dat heer mer neet wów aaftreije ...

Met unne prachtige wage stong Keizer Gerard I bovenop ozze eige Chinese moer. Prachtige pakke met kleur, pandabeire met echte bamboe; ut woort steeds gekker. D'r woorte professionele riksja's gemaak wa in mét de toesjouwers van de optochte heen en weer gerend woort. Un denske koam weer trök, noe op de achtergrond bie de vrun van Oet 't Niks,  Live in de zoepkoel van Venlo.

D'n Import ging weer unne nuuije weeg in. D'r versjene filmpkes op youtube, ut 'Aajd Prinse Gilde' woort geïnstalleerd en d'r woort zelfs geïnvesteerd in merchandise: os eige CV d'n Import carnavalsvlag. Mét un paar flinke knipouge woort d'r tusje de carnavalsgroepe in Ulestraote get heen en weer getoek in de aanloup nao de carnaval. Toen op unne daag de Import carnavalsvlag op mysterieuze wijze ontvreemd woort, haolde dat zelfs un speciaal oetzending van 'Opsporing verzocht' ...

D'n Import woar d'n tied al wiet veuroet. Nog veurtot de maatsjappelijke discussie joare later ging losbarsjte of unne Prins noe un menneke of un vruike maog zeen, verraste CV d'n Import door es jerste CV in Ulestraote en umstrjeke un Prinses oet te rope.

Principessa (di vino) Bianca I trotseerde weir, wind, whegte en griep en sjtong boven op de Rialto brök te geneete. De lif koam in de wage en noe de manne toch gein denske mjeh ginge doon sjtapte zie in de speciaal hieveur inein geknutselde gondola beutsjes en peddelde zich gans get mijlkes eweg op de meziek van 'o sole mio'. 

Ut ULK woort weer gewonne, dizze kjer mét ut Ulestraotse Skileedje, unne geweldige kraker dei live woort gezonge op de Top111 in Meersje. De grwatte publiekstrekkers woare echter neet die 3 manne in lederhose, meh de 4 knappe achtergrondzangeresse in dirndl die eederein flink leete jodele ...

Es veurmalig drummer in unne rockband wis Ron ut waal. Es King Ron I ging heer CV d'n Import al rock-en-rollend veur in de speciaal geboewde Wurlitzer juke box op de wage. De pruuke woare tijdens unne speciale wurrikshop bie Leo in elkaar geplek meh dat woar nog neet alles. Nao jaore van goodbedoeld huppele wat op danse mos lieke woar ut tied veur unne professionele aanpak. Nao weeke van onder begeleiding oefene in de kelder van d'n Huppel en un generale repetitie urreges in ('what happens in, stays in') Spaubeek ging de groep al swingend door de sjtraote van Ulestraote en Meersje op de meziek van Grease, Elvis en andere rockabillies. Dat woar zwah good bevalle dat de manne beslote nwats mjeh mét te doon aan ut denske ...

De sjmaak zoat d'r inmiddels good in en ut woort tied veur pekskes met kleure en lempkes en lekkere samba meziek. Frank beklom de wage es Samba Keuning Frank I, sjiek getooid mèt eige gemaakte heud en unne pries in de optoch woort weer gepak. Door ut sjlechte weir op moandig woort d'n optoch in Meersje aafgelasj meh dat zou good weure ingehoald met Haufvaste. Alhoewel, waal mét un get oetgedunde bezetting en zonder de inmiddels aafgebroke wage. 

CV d'n Import won veur de jerste kjer ut ULK, met ut leedsje 'Stumming in de Boet'.  Un nuuij tradisie woar weer geboore ...

Es prins van d'n Import haw ste toen zelf nog enige inspraak in ut thema. Doa hoofde Roel neet lang euver nao te dinke. Heer haw altied al piloot wille weure mét jel veul knappe stewardesse um zich heer. Geef de jong unne microfoon, zet ut leedsje 'Flying High' op en ziene grwatste wunsch koam oet. De wageboewers ginge hun kunste wiejer oetbreije en ut vleegtuig how zelfs inklapbare vleugels um de boch noa de Bungerstraot in Meersje te kinne make. Umtot de dansmariekes van veurig joar nog ummer bloare hawwe, koam d'r gein denske dizze kjèr meh un swingende veiligheidsinstructie.  Es extra service nao ut publiek leepe de stewards en stewardesse rond met speciaal gefabriceerde kèrkes en deilde alle drank oet dei ze thoes neet mjeh lekker vonge ...

De lede van d'n Import hawwe allemaol mehr eine grwatte wunsch in ut leve .... prins weure van de Kuutebieters en te regere euver Ulestraote tijdens de 3 carnavalsdaag. Noa joare lobbye, euverdreve vreuntelijk zeen en mèt pilskes probere Banaan um te koape woort duudelijk dat dit, es neet geboore Ulestraotenaire, veur os un jèl lestige zaak woar. Ut hef woort in eigen han genoome en CV d'n Import woar un feit. In de optoch van 2013 koste de luu van Ulestraote hun sjtum oetbringe op weih de jerste prins van CV d'n Import mos weure. Nao unne verpletterende oetsjlaag, dei 11 kjer is naogeteld, koam Prins Joep I bovedrieve. Heer sjtong fier op de prinsewage en trok same met de lede van de Road van 33 (!) en de altied knappe tanzmariekes door ut prachtige dörp.

Un tradisie woar geboore ...